如閣下不能閱讀此郵件,請點擊此處!  如閣下不希望再收到此郵件,請取消訂閱.
港超360
【港超Moment - 伊達回流尋新挑戰】
相信大家仲記得港腳伊達之前係香港隊對柬埔寨嘅精彩表現,而經歷係一季中甲聯賽嘅征戰之後,呢位能夠勝任中場指揮官或後上前鋒嘅好波之人,已經返左香港加盟和富大埔,仲已經投入訓練,佢就話今次加盟地區隊對佢黎講係新挑戰。

伊達之前同中甲球隊新疆天山雪豹只係簽左一年約,呢名港腳係成個球季都表現出色,以佢嘅經驗同技術帶起缺乏出名球員嘅天山雪豹,仲入過一啲靚波,難怪內地就有消息話球隊好後悔只係同佢簽一年約。

以伊達嘅能力,合約期滿又點會冇人爭,佢亦都承認有其他球隊斟介過佢,最終揀和富大埔佢覺得係一個新挑戰,亦因為和富大埔嘅助教陳家麒好早已經搵過佢:「大概係八、九月嘅時候,家麒已經同我講和富大埔想我加盟,到上個月仲正式邀請我傾條件。對我黎講,今次係新挑戰,我會盡全力幫助每名隊友、球隊,係下半季爭取更大成就。」

和富大埔目前聯賽榜排第5,下半季有埋伊達係中場分波,一班本地球員既能力肯定得到更好嘅發揮,相信聯賽將會鬥得更激烈!

和富大埔 vs 理文流浪
1月8日 下午2點半 大埔運動場
 
港超賽程
【第12週賽程】- 2016-17年度中銀人壽香港超級聯賽
今個週末繼續下半季港超聯賽事!下星期我地會每日同大家分析11隊半季走勢!

星期六頭場,有冠忠南區火併南華!首循環兩隊碰頭,南華憑高美斯兩球世界波全取3分,冠忠南區今仗會否從上仗汲取教訓,成功復仇呢?星期六尾場旺角大球場有東方龍獅迎戰港會,對東方龍獅黎講係大好嘅搶分機會!

星期日會有3場賽事,下午2點半同時會有和富大埔對理文流浪及標準灝天對九巴元朗。和富大埔係首循環係比賽尾後絕殺理文流浪,今次番到主場又能否雙殺對手呢?九巴元朗曾經大勝標準灝天後被對手係菁英盃第一圈成功復仇,今仗為搶聯賽3分絕不能鬆懈!第12週壓軸,傑志主場迎戰R&F富力,為保住聯賽榜首位置,傑志定必全力搶分!

本週傑志對R&F富力賽事有直播!
 
© 2005 - 2016 Hong Kong Football Association Ltd. 轉發郵件 | 更新郵箱資料 | 取消訂閱

香港足球總會
地址 : 香港九龍何文田佛光街55號
電話 : (852)2712 9122 傳真 : (852)2768 8825 電郵 : hkfa@hkfa.com (一般查詢 )