作為主人，我地最關心嘅當然係狗狗嘅健康啦！有時見到狗狗冇哂精神咁攤喺度，真係好想知佢地到底係攰定唔舒服，可惜狗狗有佢地自己一套語言，有時想關心下都難！ 不過而家開始唔使怕喇！主人只需要每日依照以下步驟做，就可以知道狗狗健唔健康！

第一步　留意小狗嘅眼睛

輕輕用手睜開狗狗雙眼，如果主人可以喺狗狗嘅眼珠入面好清晰咁見到自己，咁就表示狗狗好健康，主人唔需要擔心！

第二步　留意小狗嘅鼻頭

如果狗狗鼻頭濕濕地又涼浸浸，恭喜你呀主人！狗狗好健康！相反，如果狗狗個鼻又乾又暖，咁主人就要快啲俾水狗狗飲，幫佢補充一下身體嘅水份喇！

第三步　留意小狗嘅耳仔

記住！記住記住要定期幫狗狗清潔耳垢呀主人們！如果狗狗嘅耳仔唔乾淨，輕則會產生異味同影響狗狗嘅聽覺，重則會造成細菌入侵，傷害狗狗嘅大腦。

第四步　留意小狗嘅牙齒

原來有8成3歲以上嘅小狗都受牙周病困擾。牙齒嘅細菌同牙垢會引起牙周病同各種細菌感染，最終導致牙齒脫落！細菌感染更會擴散到狗嘅腎臟、肝臟同心臟，導致更嚴重嘅問題。所以如果主人發現狗狗口仔臭，要即刻幫狗狗清潔啲牙齒呀！

只要定期留意以上幾點，主人就可以同狗狗一齊開開心心，健健康康咁生活喇！


狗狗
AD201509