據一份關於狗狗口腔健康做嘅調查顯示，平均每10位主人當中，只有1位會留意狗狗嘅口腔健康。嘩嘩嘩！原來作為主人嘅我地，一直都忽視左狗狗嘅口腔問題，而當中仲唔小心建立左好多錯嘅概念添！

1. 主人：「狗狗又唔會好似我地咁成日食零食同講野，佢地個口一定比我地乾淨啦！」
➞ 其實狗仔同人類一樣，都會每日食野同講野。既然人類要日日刷牙，咁狗狗當然都一樣啦！如果唔係就會有好多細菌滋生係狗狗個口入面架喇！

2. 主人：「聽講狗狗嘅口水有消毒功能架喎，下次有傷口果陣俾佢舐下咪得囉！」
➞ 錯！狗狗每日都會食野，個口自然會有細菌啦！所以聰明嘅主人們，記住唔好俾狗狗嘅口水掂到你嘅傷口呀！

3. 主人：「狗狗個口有異味好正常啫，所有狗狗都有口臭問題架啦！」
➞ 錯錯錯！大錯特錯呀！只要配合適當嘅清潔，狗狗就會有健健康康嘅口腔，係唔會有異味架！相反，如果狗狗嘅口氣問題好嚴重，咁主人們就要注意喇！因為狗狗嘅口臭問題好多時都係由口腔、牙齒疾病引起架！

4. 主人：「牙齒護理？狗狗求其咬啲野都算係牙齒護理架啦！」
➞ NO la！唔係咬咩都可以幫狗狗護理牙齒架，亂咬硬物（例如：傢俱、雞骨等等）更加有可能造成狗狗牙齒斷裂問題添！

5. 主人：「都係牙啫，狗狗用我用嘅牙膏同漱口水咪得囉！」
➞ 全錯！人類用嘅牙膏同漱口水大多數含氟嘅成份，並唔適合狗狗使用。如果狗狗刷牙嘅時候唔小心吞左，有可能會中毒架！

狗狗牙齒, 狗狗健康