驚人大發現！！！8成三歲或以上嘅狗狗都有牙周病！
咁到底點先知狗狗有冇牙周病呀？
要辨識狗狗有冇牙周病好簡單，主人可以從病徵入手。患有牙周病嘅狗狗最常見有口臭、牙齒變黃、牙垢齒石積聚、牙齒鬆動、牙齦紅腫等等嘅徵狀。以上嘅問題會令狗狗不停伸脷、舔牙齒同流口水，嚴重時更加會因為牙痛而食慾不振。主人留意到狗狗有以上徵狀嘅，就記住帶佢去睇醫生喇！
狗狗嘅牙周病分左四個階段：
第一階段：牙齦炎
牙齦炎係狗狗牙周病嘅初期徵兆。係呢個階段，狗狗嘅口腔會開始出現牙菌斑，並且有輕微口氣。主人唔需要太擔心，不過就記得要儘快帶狗狗求醫喇！
第二階段：牙結石
如果狗狗嘅牙結石聚積於牙肉周邊，主人就一定要儘快處理喇！因為大量嘅牙石會造成細菌性牙齦炎，嚴重者更加會導致全身性菌血症，引起肝臟、腎臟甚至心臟感染嘅併發症，對狗狗嘅生命構成威脅。
第三階段：口臭
呢個階段嘅狗狗，口入面已經充滿左大量細菌。而呢啲細菌會分解狗狗食物中嘅蛋白質，釋放硫磺氣體，散發腐壞嘅氣味，引發嚴重口臭。呢個時候，主人就要帶狗狗搵專業嘅獸醫喇。如果狗狗嘅病情太嚴重，獸醫會幫狗狗拔牙。拔牙有可能會影響狗狗日後嘅咀嚼能力，所以話及早發現同治療牙周病真係好重要架！
第四階段：牙齒脫落
狗狗開始甩牙嘅話，就代表狗狗牙周病嘅問題已經去到非常嚴重嘅階段。佢嘅口腔、牙齒內嘅細菌已經破壞左承托牙齒嘅組織，令牙齦萎縮，引致牙齒同牙肉分離。牙齒失去牙肉承托，然後脫落。
預防勝於治療。其實只要主人定期為狗狗護齒，注意佢嘅口腔健康，就可以避免狗狗日後受口腔問題困擾。錫狗狗嘅主人們，千祈唔好偷懶呀！