尋日同大家介紹左4款狗狗同主人一樣咁啱食嘅食物～好多主人就同我地講「得4款，一星期一日一款都唔夠啦！」好啦好啦～今日就同大家繼續分享狗狗主人可以一齊食嘅食物啦：）
三文魚
肥美嘅三文魚含有豐富嘅脂肪酸，可以幫狗狗強化免疫系統之餘，仲可以幫佢地維持皮膚健康。相信大部份主人平時食三文魚都係生食嘅，但如果你係同狗狗一齊食嘅話，又想餵得安心，可以將三文魚煮熟先俾狗狗食架！
蘋果
唔講你唔知，原來好多狗狗都好鍾意咬蘋果嘅聲同口感架！而蘋果含有維他命A同C，對狗狗嘅健康好有益！之不過主人千祈唔好俾狗狗食到蘋果嘅果核呀，因為蘋果嘅果核含氟化物，食左會喺狗狗體內累積毒素架！
麥皮
食開嘅主人們都應該知道麥皮富有纖維素，大人小朋友都啱食，但原來狗狗都食得架～不過千祈唔好落煉奶呀～你以為對狗狗黎講會好味啲～但其實煉奶對狗狗黎講好甜，佢地嘅身體未必負擔到架>_<
青豆
低熱量嘅青豆唔單止含維他命K同C，仲有錳。如果你嘅狗狗有過重嘅跡象，就要多啲俾狗狗食青豆嘅食品啦～因為低熱量嘅青豆對維持狗狗健康體重係好有幫助架～