好多主人一發現狗狗牙仔唔夠白又或者有口臭問題就即刻問「死啦!到底狗狗係唔係患左牙周病呀?」其實狗狗有好多唔同種類嘅牙科疾病,唔係只得牙周病一種架!今次就睇下狗狗最常患嘅牙科疾病係邊5種啦~ 1.牙結石

牙石喺好多狗狗當中係普遍存在嘅問題。其實牙石主要係由食物殘渣同狗狗口腔入面嘅細菌混合而成嘅,而牙石亦係造成狗狗口氣問題同導致牙周病嘅主要元兇!所以主人平日要做好啲狗狗牙齒護理,因為一旦牙石形成左就好難去除架喇~

2.牙齦炎

狗狗唔識幫自己清潔牙齒,每次佢地食完野都會有好多食物殘渣留左喺個口入面。具體啲講,果啲食物殘渣係堆積左喺狗狗嘅牙齦度,令狗狗牙齦囤積左大量細菌。一旦細菌搵到位入侵牙齦,狗狗牙齦就會發炎,繼而牙痛。要知道牙齦炎其實係牙周病嘅前身, 絕對係不容輕視架!

3.蛀牙

同我地一樣,狗狗都會有蛀牙架~而造成蛀牙嘅成因大致同牙齦炎一樣,都係因為食物殘渣!當食物殘渣留左喺狗狗個口入面,細菌會以食物殘渣為養份不斷滋生,同時釋放出一種酸性物質。而當呢種酸性物質同牙齒接觸,牙齒嘅鈣質就會被慢慢溶解,從而形成蛀牙。

4.斷牙

相信不論有冇養狗嘅人都知道鍾意咬野係狗狗嘅天性,但又有幾多人知道原來唔係所有野都適合狗狗咬架呢?好多人一直都以為狗狗咩骨都咬得,見佢咬野都唔會stop佢。呢個concept唔啱架~!原來狗狗咬到硬物係有可能會令佢地牙齒磨損甚至斷裂架!

5.牙周病

壓軸出場嘅當然係大家最熟悉嘅牙周病啦!主人們記住要勤力啲幫狗狗做牙齒護理呀!因為牙結石嘅積聚會變成牙周病,而牙周病會令狗狗牙肉發炎、含膿同流血,仲會破壞牙肉組織,更加有可能引發腎臟甚至心臟感染的併發症……牙周病真係好恐怖呀!所以主人平日一定要幫狗狗做好牙齒護理。除左刷牙仔之外,主人仲可以日日餵狗狗食潔齒骨~而一旦主人發現狗狗有牙周病徵狀,就要即刻帶佢去求醫喇!