夏天對狗狗黎講係一個又愛又恨嘅季節！開心嘅係主人放暑假，自然多左時間陪狗狗～之但係夏天天氣咁熱，對狗狗黎講係好辛苦架！一般黎講，狗狗嘅體溫介乎攝氏37.5至39.5度，俾我地人類高。雖然狗狗體溫高過我地，但由於狗狗嘅汗腺唔足以幫佢地散熱，佢地忍受高溫嘅能力比我地人類低，亦比我地人類易中暑。而家就等我同大家講下狗狗中暑徵狀同預防方法啦～


狗狗嘅中暑徵狀同我地人類大致相同，不外乎以下幾點：

- 心跳加速
- 牙齦發白
- 舌頭鮮紅
- 呼吸困難
- 嘔吐
- 口水濃而黏稠
- 抽搐

如果唔想狗狗辛苦，就要記住以下幾點，幫狗狗好好預防中暑喇！

1.     唔好幫狗狗一次過剃哂所有毛！
好多主人都會趁夏天幫狗狗剃毛，但剃還剃，千祈唔好貪方便一次過幫佢剪哂所有毛呀！每次剃毛，主人都要記住至少留1吋厚嘅毛毛喺狗狗身上，因為啲毛毛可以幫狗狗擋太陽，預防皮膚病同曬傷，好重要架！

2.     確保空氣流通～
千祈唔好留狗狗喺空氣唔流通嘅室內。如果想留狗狗喺室內，記住要先幫佢開窗、開風扇或者冷氣。如果要留狗狗喺車入面，更加一定要開冷氣，因為車窗係唔足夠令狗狗保持涼爽架！


3.     為狗狗準備足夠嘅水！
每次出街前，主人都要記住幫狗狗準備足夠佢飲用嘅水，因為飲水可以幫狗狗降溫。 可以嘅話，主人最好帶埋凍水同狗狗出街。唔係俾狗狗飲呀～而係喺適當嘅時侯幫狗狗用凍水擦手掌腳掌！呢啲方法都可以幫狗狗有效降溫，預防中暑架：）

http://dogdogoralhealth.blogspot.hk